यल, १२ सिल्लाथ्व : लोक साहित्य परिषदं ‘गौरी–अनन्त सिरपाः’ नेवाः सूचना केन्द्रयात लःल्हाःगु दु ।
थनया बखुंबहालय् शनिबाः ग्वसाःग्वःगु समारोहय् नेपालभाषाय् निरन्तर सूचना प्रवाह यानाः योगदान बियाच्वंगुलिं निदँय् छकः बिइगु थ्व सिरपाः उगु केन्द्रयात लःल्हाःगु खः ।
नेवाः सूचना केन्द्रं नेवाः समुदायनाप स्वानाच्वंगु थी थी पक्षयात कया ग्वसाःग्वइगु ज्याझ्वःया न्ह्यवं सूचं बियेगु व थ्वज्याःगु ज्याझ्वःया सामाजिक सञ्जालपाखें फयांफक्व प्रसारण यायेगु ज्या यानावयाच्वंगु दु ।
सिरपाःया राशी ५० द्वः ध्यबा लिसें दसिपौ नं ब्यूगु खः । उगु सिरपाःया दाता विपुल श्रेष्ठ खः ।
ज्याझ्वःया मूपाँहा नेपालभाषा एकेडेमीया चान्सलर मल्ल के. सुन्दरं शासन सत्तापाखें न्ह्याक्वः हे दमन फयेमाःसां भाषा व संस्कृतिया अनुरागीतय् निस्वार्थ त्याग व समर्पणया हुनिं नेवाः भाय् व संस्कृतियात धस्वाकातये फूगु खः धकाः धयादिल ।
उगु ज्याझ्वलय् साहित्यकारत रमिला बज्राचार्य, यज्ञरत्न धाख्वाः, रमेशमान पिया, केशरमान ताम्राकार, पवित्र वज्राचार्य, हिराकाजी महर्जनं उगु केन्द्रं यानावयाच्वंगु योगदानयात कयाः चर्चा यानादीगु खः ।
