येँ, १२ सिल्लाथ्व : सञ्चारकःमि दीपक समिरं च्वयादीगु बाखं मुना ‘मुना मदनको डिभोर्स पार्टी’ विमोचन जूगु दु । शनिबाः नेपाल प्रज्ञा भवन, कमलादीइ च्वंगु पारिजात हलय् सार्वाजनिक प्रसारण सेवा नेपालया नायः महेन्द्र विष्ट, दुजः पूmलमान वल, साहित्यकार डा गीता त्रिपाठी, च्वमि समिरलिसेंंया व्यक्तित्वतय्सं मंकाः कथं बाखंमुनाया विमोचन यानादीगु खः । बाखं, म्ये, गजल च्वयाः च्वंसां मुनाः न्हापांगु खुसिइ सपूmया रुपय् हयागु धकाः च्वमि समिरं धयादिल ।
वय्कलं धयादिल, “जिं थी थी इलय् च्वयाःगु बाखंयात मुनाः थ्व सपूm पिकानाःगु खः । थ्व जिगु न्हापांगु कुतः जूगुलिं छुं मगाःमचाः जूगु जुइफु, अथे खःसां जिं इमान्दारितां हे थुकियात सृजना यानाःगु दु । थ्व जिगु निंतिं न्ह्याबलें मू वंगु जुयाच्वनी ।”
वय्कलं छेँजःया ग्वाहालि व थःगु मेहनतं च्वयेगु यात्राया न्हापांगु त्वाथः गयेत ताःलाःगु धयादिल । वय्कःया बुन्हि लाकाः ‘मुना मदनको दिभोर्स पार्टी’ बाखं मुनायात इन्डिगो इङ्कं बजारय् हःगु खः । उगु ज्याझ्वलय् सपूmया समीक्षा यासें डा त्रिपाठीं न्हापांगु कुतः च्वछाये बहः जूगु धयादिल ।
“च्वमिया कल्पना शक्तिं यक्व हे खँत स्वानातःगु दु । न्हापांगु बाखं मुना जूगुलिं थन छुं मगाःमचागु खनेदुसां मखंसु यायेगु जुइ । थुकिइ दुथ्याका तःगु बाखंलय् विविधता दु”, साहित्यकार डा त्रिपाठीं धयादिल ।
सार्वजनिक प्रसारण सेवा नेपालया नायः डा विष्टं सञ्चारकर्म नापनापं च्वमिया कथं न्ह्याःगु यात्रायात सन्तुलित यानाः न्ह्याःवनेत भिंतुना बियादिल । वय्कलं धयादिल, “वय्कः बांलाःम्ह सञ्चारकःमि जूगुलिं च्वमिया म्हसिका स्वानाः निगूलिंयात सन्तुलन यानाः न्ह्याकादी धयागुलिइ विश्वास दु । वय्कःया बाखंलय् विविधता दु, रोचकता दु । सामाजिक विकृतियात न्ह्यथना ध्याचु नकेगु नापं थुकी सचेत नं यानातःगु दु ।”
अथे हे, सार्वजनिक प्रसारण सेवा नेपालया दुजः बलं बाखं च्वमि समिरयात कुमार नगरकोटी शैलीया च्वमिया कथं म्हसिकाःगु धयादिसें वय्कः चीधंगु विषयवस्तुकय् नं बाखं च्वयेफुम्ह बाखंच्वमि धकाः च्वछानादिल । ज्याझ्वलय् साहित्यकार, कवि, सञ्चारकःमित नं उपस्थिति दूगु खः ।
