काठमाण्डू, ७ माघ: राष्ट्रीय समता पार्टी नेपाल बाराके प्रसिद्ध गढीमाई मन्दिरमे भेल तोड़फोड़के घटनापर गम्भीर धीयान देबाक लेल गृहमन्त्री रमेश लेखकसँ तत्काल दोषीकेँ पहिचान क कड़ा कानूनी कारबाही करबाक मांग कएलक अइछ।
पार्टीक राष्ट्रीय अध्यक्ष विजयप्रकाश निषादक नेतृत्वमे महासचिव अभिषेक तिवारी आ केन्द्रीय कार्यकारिणी समिति सदस्य छत्रबहादुर श्रेष्ठक समुह गृहमन्त्री लेखकसँ भेट क ज्ञापनपत्र सौपलक अइछ । महासचिव तिवारीक विज्ञप्तिमे उल्लेख अइछ “माघ ३ गते राइत १० बजे किछु अराजक समूह अपराधी मानसिकताक सङे मन्दिरमे भेटल पेरवाके चोरी आ लूटपाटक उद्देश्यसँ प्रवेश करैत काल नगर प्रहरी रोकलाक बादो झगड़ा आ माइरपिट कएलक ।
विज्ञप्तिमे इहो उल्लेख अइछ जे शुकरदिन सबेरे सुनियोजित रूपे अराजक समूह फेरसँ मन्दिर परिसरमे प्रवेश क दानपेटिका आ पंखा तोइड़ चरम उद्दण्डता केलक, जकर प्रमाण सीसीटीवी फुटेजमे स्पष्ट रूपसँ देखल गेल।
पार्टीक अनुसार गढीमाई मन्दिरमे भेल एहि कुकृत्य आ उद्दण्डताक विरुद्ध शीघ्र कारबाही करबाक आवश्यक अइछ। ज्ञापनपत्रक माध्यमसँ बारा जिलामे अवस्थित विश्व प्रसिद्ध मन्दिरक संरक्षण आ अपराधीकेँ कानूनी कठघरामे आनबाक आह्वान कएल गेल अइछ।
