येँ, ६ पोहेलागा : प्रधानमन्त्री केपी शर्मा ओलीं नेपाः न्यायोचित व अन्तर्राष्ट्रिय हितलिसेंया राष्ट्रिय हित यायेगु पक्षय् दुगु खँ ध्वाथुइकादीगु दु ।
नेकपा (एमाले) या परराष्ट्र मामिला विभागं थौं ग्वसाःग्वःगु ‘नेपाःया परराष्ट्र नीतिबारे सांसद संवाद’ कार्यक्रमयात थौं संबोधन यानादिसें प्रधानमन्त्री ओलीं चीचिधंगु व ततःधंगु देय्तय्गु हित समान हित खः धइगु मान्यता ज्वनाः नेपाःया सार्वभौमिकता, स्वाभिमान व भौगोलिक अखण्डताया पक्षय् नेपाः न्ह्याबलें कटिबद्ध जुयाच्वनीगु खँ धयादिल ।
“झीसं झीगु राष्ट्रिय हितया खँ ल्हाइबलय् हलिमय् शान्ति व मानवीय हितयात नं नापं यंकेगु याना । संयुक्त राष्ट्रसङ्घया बडापत्र, पञ्चशील व असंलग्नताया सिद्धान्तपाखें झीपिं निर्देशित जुयाच्वंगु दु । झीसं थवंथः लाभ व सहअस्तित्वय् भलसा याना”, प्रधानमन्त्री ओलीं धयादिल, “झी सुं नं शत्रु मदु, फुक्कं झी मित्र खः धइगु भाव ज्वनाः झीसं वैदेशिक सम्बन्ध दयेकाच्वनागु दु । भूराजनीतियात क्यनाः थःगु कायरतायात सुचुकेगु ज्या झीसं मयाना । राष्ट्रिय हितया रक्षा यायेत भूराजनीतिक परिस्थितियात झीसं सन्तुलितकथं सामना यायेफु । जःलाखःला देय्लिसे न्यासि मचाःसे खुलस्त व मित्रतापूर्ण जुयाः थःगु जायज खँत न्ह्यथनेमाः । मेँ जक संकाः मथुइक कूटनीतिक संवाद यायेमाः धइगु मदु । थुइक संवाद यायेमाः । अथे खँ ल्हात धाःसा मेगु पक्षं नं थःगु धारणा तयेत अःपूगु महसुस याइ ।”
वय्कलं राष्ट्रिय स्वार्थयात तिलाञ्जली बियाः सत्ता स्वार्थया निंतिं पुलिं चुइगु राष्ट्रिय हित मजूगु व चीधंगु देय् खः धइगु हीनताभाव दयेकेमाःगु आवश्यकता मदूगु धारणा नं तयादिल । राष्ट्रिय हितस्वयां सत्ता स्वार्थ व चिचीधंगु खँतय्त महत्त्व बिइगु प्रवृत्ति पाय्छि मजूगु न्ह्यथनादिसें प्रधानमन्त्री ओलीं नेपालं आर्थिक, सांस्कृतिक व कूटनीतिक हितयात ध्यान बियाः विश्वसनीय व जिम्मेवार जुयाः थः प्रस्तुत जुइगु धयादिल ।
प्रधानमन्त्री ओलीं संसदय् फुक्क विषयकय् गाक्क अध्ययन व तयारी यानाः प्रस्तुत जुइत व संसद्यात जिवन्त दयेकेत सांसदतय्त नं सुझाः बियादिल । ज्याझ्वलय् विश्व व्यवस्थाय् नेपाःया परराष्ट्र नीति, हिलावंगु भू–राजनीतिक परिवेश, जलवायु राजनीति व कूटनीतिथेंजाःगु विषयकय् परराष्ट्र मामिला विज्ञतय्सं कार्यपत्र प्रस्तुत यानादीगु खः ।
