वीरगञ्ज (पर्सा), ६ पोहेलागा : सशस्त्र प्रहरी बल नेपाल नम्बर १३ हेडक्वाटर पर्सापाखें २४ क्वःगु सशस्त्र प्रहरी दिवसया लसताय् थन हिदान ज्याझ्वः याःगु दु । सीमा सुरक्षाय् ज्या यानाच्वंपिं सशस्त्र प्रहरीतय्सं चिकुलाया इलय् पर्साय् हिया म्हतियात परिपूर्ति यायेया निंतिं न्ह्याकूगु उगु हिदान ज्याझ्वलय् ५७ पिन्ट हि मुंकूगु दु ।
सशस्त्र प्रहरी बल नेपाल नम्बर १३ हेडक्वाटर पर्साया गणपति राधेश्याम धिमालं पर्सा जिल्लाय् हिया म्हति छुं हदतक जुसां नं परिपूर्ति यायेया निंतिं हिदान ज्याझ्वः यानाःगु धका धयादिल । “सशस्त्र प्रहरी बल सीमा सुरक्षाया नापनापं नागरिकतय्नापं मिलेजुयाः न्ह्यावनेया निंतिं हिदान ज्याझ्वः यानाःगु खः”, वय्कलं धयादिल, “रक्तदान ज्याझ्वलय् उत्साहजनक ब्वति दयाच्वंगु दु ।” सशस्त्र प्रहरी बल पर्सापाखें नेपाल–भारत सीमा लागाय् स्वास्थ्य शिविर थेँजाःगु गतिविधित न्ह्याकावयाच्वंगु दु ।
वीरगञ्ज महानगरया प्रमुख राजेशमान सिंहं सशस्त्र प्रहरीें सुरक्षाया नापनापं सामाजिक उत्तरदायित्वयात नं उत्तिकं हे ध्यान बिया वयाच्वंगु धकाः लसता प्वंकादिल । वय्कलं धयादिल – “पर्साया सुरक्षा निकायं सुरक्षाया अलावा मेगु सामाजिक ज्याखँय् सक्रिय जूगुलिं जनतां सहज अनुभूति यानावयाच्वंगु दु ।”
