येँ, ६ पोहेलागा : कुवतेय् च्वंगु नेपाःया राजदूतावासं सरकारपाखें हःगु सामाजिक सुरक्षा अवधारणाय् दुतिनेत नेपाःमि श्रमिकतय्त इनाप याःगु दु ।
वित्तीय सचेतना, विप्रेषण लिसें सामाजिक सुरक्षा कोष थेँ जाःगु महत्वंजाःगु विषयय् सचेतना अब्वयेकेया निंतिं कुवेतय् च्वंगु वित्तीय संस्था लिसें मनि ट्रान्सफर एजेन्सीया भूमिकाया विषयय् ‘वित्तीय सचेतना व सुरक्षित विप्रेषण आप्रवाह’ अन्तरक्रिया ज्याझ्वः यानाः उगु इनाप याःगु खः ।
ज्याझ्वलय् कुवेतय् च्वंगु गैरआवासीय नेपाली संघ, नेपाल पत्रकार महासंघ वैदेशिक कचाया प्रतिनिधि व नेपालय् द्यबाः छ्वइगु कुवेतया अप्वः धैथें वित्तीय ख्यःया संघसंस्थाय् ज्या यानाच्वंपिं नेपाली प्रतिनिधितय्सं ब्वति काःगु दूतावासं धाःगु दु ।
ज्याझ्वलय् थःगु नुगः खँ तयादिसें राजदूत घनश्याम लम्सालं कुवेतय् ज्या यानाच्वंपिं नेपाःमि श्रमिकतय्त वित्तीय सचेतनाया बारे खँ थुइकेमाःगु धयादिल । वित्तीय सचेतना व सामाजिक सुरक्षा ज्याझ्वःया महत्वबारे नेपाःमि श्रमिकतय्त ध्वाथुइकाः उगु ज्याझ्वलय् दुथ्याकेमाःगु खँ वय्कलं कुलादिल ।
ज्याझ्वलय् ब्वतिकाःपिंसं वित्तीय सचेतना, नेपालय् विप्रेषण छ्वयेगु तौरतरिका व ह्वताः लिसें सामाजिक सुरक्षा कोषयात अझं प्रभावकारी दयेकेगु व श्रमिकया ब्वति अप्वयेकेगु विषयय् थःथःगु नुगः खँ तःगु खः । ब्वतिकाःपिंसं वित्तीय सचेतनाया बारे दूतावासपाखें थःगु खँ तःगुलिं सुभाय् ब्यूगु दु ।
उगु ज्याझ्वलय् कुवेतया वित्तीय ख्यलय् ज्या यानाच्वंपिं नेपाःया प्रतिनिधि व राजदूतावासया कूटनीतिक कर्मचारीतय्सं ब्वति काःगु खः ।
