काठमाण्डू, १८ माघ: प्रतिनिधिसभाके पाँचम अधिवेशन प्रारम्भके अवसरमे प्रधानमन्त्री केपी शर्मा ओली सभाके सम्बोधित करैत विकाश निर्माणमे शुरू कएल गेल काजमे प्रगति भ रहल अइछ बताैलैन अइछ।
ओ कहलैन “देशके समृद्ध बनेबाक लक्ष्य सङ सरकार आगाँ बइढ़ रहल अइछ आओर महत्वपूर्ण परियोजनाक प्रगति प्रस्तुत कएल गेल छै।” प्रधानमन्त्री ओली हाले सिद्धबाबा सुरंग मार्गक ‘ब्रेक थ्रू’के एकटा उपलब्धि बतबैत, सड़क यात्राक असुरक्षा घटाबए आओर पूर्वाधारके टिकाउ बनेबाक लेल सुरंग मार्गक योजना आगाँ बइढ़ रहल उल्लेख कएलैन।
ओ काठमाण्डू–तराई मधेश द्रुतमार्ग अंतर्गत मकवानपुरक धेद्रे सुरंग तथा चीन आ भारतके जोड़ैबला राष्ट्रीय गौरवक परियोजना जोगबनी–किमाथाङ्का सड़क मार्ग सेहो किछु दिन पहिने ‘ब्रेक थ्रू’ भेल से अवगत कराैलैन। प्रधानमन्त्री ओली कहलैन जे ठेकेदार कम्पनी काज छोड़लाके बाद बुटवल–नारायणगढ खण्डक सड़क निर्माण तेजीसँ आगाँ बइढ़ रहल अइछ। ओ कहलैन “मन्त्रिपरिषद्क पहिल बैसारमे कीर्तिपुरक क्रिकेट खेल मैदानके रंगशाला बनेबाक आओर ओहिमे फ्लडलाइट जोड़बाक निर्णय कएल गेल छल, जइ अनुरूप टेंडर आह्वान भ चुकल अइछ आओर निश्चित समयसँ पूरा करबाक लेल काज आगाँ बइढ़ रहल अइछ।”
“एहिना, सुर्खेतमे आधुनिक कर्णाली रंगशाला तैयार भ चुकल अइछ। विकाश निर्माणक काजमे ‘ब्रेक-थ्रू’ मात्रे नै, ‘ब्रेक’ लागल कतेको काजकेँ सेहो हमसभ आएलाक बाद आगाँ बढ़ेलाैँ,” प्रधानमन्त्री ओली अपन सम्बोधनमे कहलैन।
