येँ, १० सिल्लाथ्व : संयुक्त राष्ट्रसङ्घया मिसाविरुद्ध जुइगु दक्व कथंया भेदभाव ज्यंकेगु महासन्धिसम्बन्धी ‘सिड’ कमिटीया मुँज्याय् नेपाली याकः मिसाया न्यायसम्बन्धी विषय दुथ्याकूगु दु ।
स्विटजरल्यान्डया जेनेभाय् क्वचाःगु ‘सिड’ कमिटीया ९०क्वःगु मुँज्याय् राष्ट्रिय मानवअधिकार आयोगया दुजः नापं मानवअधिकारया निंतिं मिसा, याकः मिसा पुचःया संस्थापक अध्यक्ष डा लिली थापां उगु विषययात दुथ्याकादीगु खः ।
वय्कलं सीमान्तकृत समुदायया मिसातय्गु न्यायस पहुँच दयेकेत हाथ्या दूगु न्ह्यथनादिसें उगु महासन्धिइ जूगु प्रावधानयात छ्यलाबुलाय् हयाः थप प्रगति यायेत नेपाल सरकारलिसे नं इनाप यानादिल ।
आयोगया दुजः डा थापां नेपालय् मिसा अधिकारया प्रवद्र्धनय् जूगु प्रगतियात सकारात्मक मूल्याङ्कन यानादिसें कानुनी संरचनाय् अझ सुधार आवश्यक जूगु धारणा तयादिल ।
मांया नामं नागरिकता कायेत अझ थाकूनिगु कनादिसें विधवा मिसाया सामाजिक न्यायया संवैधानिक हक कायेगुलिइ हाथ्या दयाच्वंगु व याकः मिसा सुरक्षाकोष स्थानीयकरण नापं कार्यान्वयन मजूगुलिं फुक्कधइथें याकः मिसात सुरक्षाकोषया ग्वाहालिपाखें वञ्चित जूगु विषयवस्तु क्यनाः विश्व समुदाययात ध्यानाकर्षण यानाच्वना धकाः वय्कलं कनादिल ।
अथे हे, याकः मिसा सुरक्षाकोषयात फयांफक्व याकनं छ्यलाबुलाय् हयेत राज्य गम्भीर जुइमाःगु विषय मुँज्यालिसें मुलुकया थी थी जातजाति, लागा, वर्ग, लिङ्गलिसेंया ख्यलय् जुयावयाच्वंगु फुक्क कथंया विभेद अन्त्य यायेत व्यवस्था यानातःगु संवैधानिक प्रतिबद्धतायात व्यवहारय् लागू यायेमाःगु मुद्दा थनाः धकाः वय्कलं धयादिल ।
याकः मिसा पुचलं थ्यंमथ्यं स्वंगू दशकनिसें नेपालय् याकः मिसाया हकअधिकार, न्याय, ब्वति अप्वकेगु, लैङ्गिक समानता, मानवअधिकार, शान्ति नापं न्याय व मानवीय ग्वाहालिया ख्यलय् ज्या यानावयाच्वंगु मानव अधिकारया निंतिं मिसा, याकः मिसा पुचःपाखें पिथंगु प्रेस विज्ञप्तिइ न्ह्यथनातःगु दु ।
