येँ, १० सिल्लाथ्व : उपप्रधानमन्त्री लिसें सहरी विकासमन्त्री प्रकाशमान सिंहं ज्या याइपिंत गफ याइपिं नाप तुलना मयायेत धयादीगु दु । थौं येँ महानगरपालिका–२९ या वडा भवन उलेज्या यासें वय्कलं गुलिसिनं संविधान जारी यायेगु खँयात नं छुं मखु धयावयाच्वंगु धासें उकिइ आपत्ति यानादिल ।
“संविधान जारी यायेगु नं छुं मखु धाइ । छु यासाः तःधंगु ज्या जुइ थन ? ज्या याइपिंत अथें हावादारी गफ याइपिंनाप तुलना याना जिइला ?” वय्कलं खँ न्ह्यथनादिल , “छिकपिंसं व झीसं होहल्ला याइपिनिगु नियत छु खः थुइकादीमाल ! राजनीतिइ जुयाः सेवा याइपिं व ठगे यानाः नइपिंबारे ख्वाउँगु दिमागं लेखाजोखा याये आवश्यक जु ।”
उपप्रधानमन्त्री सिंहं नागरिकया चाहनाकथं स्थिर सरकारया निंतिं कांग्रेस–एमाले मिलेजूगु खः धासें व हे कथं ज्या जुयाच्वंगु व अर्थतन्त्र चलायमान यानाः लँपूइ हयेगुया निंतिं अध्यादेश हःगु धकाः कनादिल ।
अथे हे यानाः वयकलं उपयोगविहीन सार्वजनिक जग्गा जनताया निंतिं जुयेमाःगु व स्थानीयतय्सं उपभोग यायेमाःगु खँय् बः बिसें सरकारं उकिया निंतिं ज्या यानाच्वंगु धयादिल । उपप्रधानमन्त्री सिंहं थःम्हेसिनं प्रतिनिधित्व यानाःगु येँ क्षेत्र नं १ य् सडक, सामुदायिक ब्वनेकुथिया पूर्वाधारया अप्वः ज्या जुयाच्वंगु खँ न्ह्यथनादिसें आः स्वास्थ्यया ख्यलय् ध्यान बिइगु प्रतिबद्धता प्वंकादिल ।
