येँ, ३ सिल्लागा : सरकारय् ब्वति कयाच्वंगु राजनीतिक दलया शीर्ष नेतातय्गु थौं प्रधानमन्त्री निवासय् क्वचाःगु मुँज्याय् नकतिनि धइथें पिथंगु अध्यादेशत सङ्घीय संसद्या निगुलिं सदनं फयांफक्व याकनं अनुमोदन यायेगु सहमति जूगु दु ।
फयांफक्व याकनं अध्यादेश पारित याकेत प्रक्रियागत ज्या थत्थें न्ह्याकेत मुँज्याय् सहमति जूगु गृहमन्त्री रमेश लेखकं धयादिल ।
“थौं झीपिंदथुइ जूगु सहमतिकथं अध्यादेश न्ह्याःवनी । सकारात्मक कथं थ्व विषय क्वःजी”, मुँज्यालिपा संवाददातातय्त वय्कलं कनादिल ।
छगू न्ह्यसःया लिसलय् वय्कलं जनता समाजवादी पार्टी नेपाल(जसपा)या नेतातलिसे नं सहमति जूगु खँ कनादिल । दक्व अध्यादेशत हिलेमाःगुलिं दलतदथुइ सहलह जुइधुंकाः सकसियां भावना कःघानाः प्रक्रिया न्ह्याइगु वय्कःया धापू खः ।
मुँज्याय् सरकार व संसद्या ज्याया प्रभावकारिताया बारे नं सहलह जूगु खः ।
मुँज्याय् प्रधानमन्त्री नापं नेकपा(एमाले)या अध्यक्ष केपी शर्मा ओली, नेपाली कांग्रेसया सभापति शेरबहादुर देउवा, एमालेया वरिष्ठ उपाध्यक्ष ईश्वर पोखरेल, कांग्रेसया उपसभापति पूर्णबहादुर खड्का, जनता समाजवादी पार्टीया अध्यक्ष अशोककुमार राई, लोकतान्त्रिक समाजवादी पार्टीया अध्यक्ष महन्थ ठाकुर, नागरिक उन्मुक्ति पार्टीया अध्यक्ष रञ्जिता श्रेष्ठ व जनमत पार्टीया उपाध्यक्ष अब्दुुल खानलिसें ब्वति कयादीगु खः ।
