नेपालगञ्ज, ४ जेठ : चलचित्र पत्रकार सङ्घ नेपाल बाँकेले मोफसलमा रहेका नृत्य निर्देशकसहित दुई जनालाई आज सम्मान गरेको छ ।
चलचित्र पत्रकार सङ्घको २६औँ वार्षिकोत्सव तथा चलचित्र पत्रकारिता दिवसका अवसरमा आयोजित कार्यक्रममा नृत्य निर्देशक नवराज सुवेदी र पत्रकार सावित्री गिरीलाई सम्मान गरिएको हो । दुवैजनालाई नगद तथा प्रमाणपत्रसहित सम्मान गरिएको हो । मोफसलमा रहेर सुवेदीले दर्जनौँ म्युजिक भिडियो र लघुचलचित्र निर्देशन गर्नुभएको छ ।
चलचित्र विधामा कलम चलाउन प्रोत्साहन गर्नेगरी पत्रकार गिरीलाई सम्मान गरिएको चलचित्र पत्रकार सङ्घ नेपाल बाँकेका अध्यक्ष रामचन्द्र पौडेलले जानकारी दिनुभयो । सो अवसरमा नेपाल पत्रकार महासङ्घ लुम्बिनी प्रदेशका अध्यक्ष शुक्रऋषि चौलागाईंले कलाकार, पत्रकार, सिनेमा हल र दर्शक एकअर्काका परिपूरक भएका उल्लेख गर्दै चलचित्र पत्रकार सङ्घले सबै निकायबीच समन्वय बढाउन भूमिका खेलिरहेको बताउनुभयो ।
कार्यक्रममा नेपाल पत्रकार महासङ्घ बाँकेका अध्यक्ष नवीन गिरी, बरिष्ठ पत्रकार निरज गौतम, सङ्गीतकर्मी तथा चलचित्र पत्रकार सङ्घ नेपाल बाँकेका सल्लाहकार सुन्दर गुरुङ र सङ्घका अध्यक्ष रामचन्द्र पौडेलले आ–आफ्नो धारणा राख्नुभएको थियो ।
