नेपालमाथि भ्रष्टाचार मुद्दा, दाहाल भन्छन् : ओलीको प्रतिशोधको गन्ध आयो, अख्तियारमाथि पनि प्रश्न

शुक्रबार संसद्‍ भवनबाहिर सञ्चारकर्मीहरूसँगको कुराकानीमा अध्यक्ष दाहालले मुद्दा दर्ता भए पनि अदालतले सफाइ दिनेमा स्वयं नेपाल र आफू पनि विश्वस्त रहेको बताएका हुन् ।

पहिले मन्त्रिपरिषद्का निर्णय आफ्नो क्षेत्राधिकारभित्र पर्दैन भनेर पन्छिएको अख्तियारको पछिल्लो कदमले प्रश्न पनि उब्जिएको दाहालले बताएका छन् । ‘स्वयं माधवजी नै आश्चर्यमा परेको कुरा गर्नु भएको छ, उहाँले अदालतप्रति पनि भरोसा देखाउनु भएको छ । अदालतले न्याय गर्छ भन्ने उहाँले विश्वास व्यक्त गर्नु भएको छ । छिट्टै सफाइ पाएर फर्किन्छु भन्ने उहाँले विश्वास व्यक्त गर्नु भएको छ । मैले पनि उहाँले सफाइ पाउनुहुन्छ होला भन्ने विश्वास गरेको छु,’ अध्यक्ष दाहालले भने ।

राजनीतिक प्रतिशोधको घटना हो भन्ने प्रश्नमा अध्यक्ष दाहालले भने, ‘प्रधानमन्त्रीको राजनीतिक प्रतिशोधको गन्ध आएको छ । अख्तियारको कदमले पनि केही प्रश्न त उठेको छ । कुनै पनि प्रधानमन्त्री र क्याबिनेटको नीतिगत निर्णय अख्तियारको क्षेत्राधिकारभन्दा बाहिरको विषय भएकाले ललिता निवास प्रकरणका सन्दर्भमा बाबुराम भट्टराई र माधवकुमार नेपालमाथि जे प्रश्न उठेको थियो- अख्तियारले यो हाम्रो क्षेत्राधिकारभित्र पर्दैन जे गर्नु छ क्याबिनेटले नै गरोस् भनेर चिठी लेखेको मैले नै हेरेको छु । अहिले पनि माधवजीले नीतिगत निर्णय नै गरेको हो । २०६४ पछिका सबै प्रधानमन्त्री र मन्त्रीमाथि छानबिन गर्न हामीले नै भन्दै आएका छौँ तर यो नीतिगत र सैद्धान्तिक रूपले सही हो वा होइन भन्ने प्रश्नचाहिँ हो । ‘