जेष्ठ २५, २०८२
काठमाडौँ — प्रेमिकाको हत्या आरोपमा भारतमा एक नेपाली पक्राउ परेका छन् । भारतीय सञ्चार माध्यमहरूका अनुसार ३३ वर्षीया प्रेमिका तारा बोहराको हत्या आरोपमा ३० वर्षीय विजय टोपा पक्राउ परेका हुन् ।
तेलंगाना टुडेका अनुसार बोहरा र टोपा ‘लिभ-इन रिलेसनसिप’ मा थिए । तेलंगाना टुडेका अनुसार टोपाले हत्या गरेर बोहराको शव ट्रली ब्याग(सुटकेस)मा फ्याँकेका थिए । सोही ट्रली ब्यागका आधारमा प्रहरी टोपासम्म पुगेको हो । प्रहरीका अनुसार दुवै जनाको भेट फेसबुकमार्फत भएको थियो । बोहरा विवाहित हुन् ।
उनका दुई सन्तानसमेत रहेको तेलंगाना टुडेले जनाएको छ । उनी यसै वर्षको अप्रिलदेखि टोपासँग हैदराबादमा बस्न आएकी थिइन् । बोहरा गर्भवती भएपछि हैदराबादकै एउटा भाडाको घरमा बस्ने उनीहरूबीच झगडा भएको थियो । टोपाले गर्भपतन गराउन दबाब दिँदै आएको र नियमितजसो झगडा हुने पनि समाचारमा उल्लेख छ ।
मे २३ मा टोपाले नाइलनको डोरीले घाँटी कसेर बोहराको हत्या गरेका थिए । अर्को दिन उनले कुकटपल्लीबाट ट्रली ब्याग किनेर ल्याए । त्यही ट्रली ब्यागमा बोहराको शव राखेर बाचुपल्लीको खालि ठाउँमा फ्याँकिदिए । जुन ४ मा स्थानीयले उक्त ब्याग देखेपछि प्रहरीलाई खबर गरेका थिए ।
उक्त घटनाको अनुसन्धान गर्न प्रहरीले ५ वटा विशेष टोली परिचालन गरेको थियो । सीसीटीभी फुटेजबाट ७० वटा ब्याग पसलमा छानबिन भएको थियो । त्यत्तिकैमा एउटा फुटेजमा टोपाले ब्याग किन्दै गरेको देखिएपछि प्रहरी घटनाको चुरोसम्म पुगेको हो । उनलाई बिहीबार पक्राउ गरी थप अनुसन्धान प्रक्रिया अघि बढाइएको प्रहरीले जनाएको छ । सोधपुछका क्रममा उनले आफ्नो अपराध स्वीकार गरेको समेत प्रहरीले दाबी गरेको छ ।
