नारायणगढ (चितवन), २२ माघः विश्व क्यान्सर दिवसके अवसर पर आइ चितवनके भरतपुर स्थित बिपी कोईराला मेमोरियल क्यान्सर अस्पतालद्वारा ‘वाकाथन’ कार्यक्रम सम्पन्न कएल गेल अइछ ।
एहि कार्यक्रममे अस्पतालमे कार्यरत चिकित्सक, कर्मचारी आ क्यान्सरसँ सम्बद्ध सैकड़ो लोकसभ सहभागिता जनौलैथ। भोर अस्पताल परिसरक १ नं गेटसँ कार्यक्रम शुरू भ बुद्धचोक, कटहर चोक, पीपलचोक आ अस्पतालक २ नं गेट होइत फेर अस्पताल परिसरमे समाप्त भेल।
अस्पतालक निर्देशक डा. शिवजी पौडेल जानकारी देलैथ जे फेब्रुअरी ४ क दिन अस्पतालद्वारा विश्व क्यान्सर दिवसक अवसरमे वाकाथन कार्यक्रम शुरू करैत दिवस मनाएल जा रहल अइछ। ओ कहलैन “सन् २०२५ के नारा ‘युनाइटेड बाई युनिक’ छै, जे भिन्नतामे एकताक दर्शबैत अइछ। चिकित्सक आ स्वास्थ्यकर्मीसभकेँ बेमारसभक भिन्न चरित्र बुइझ तिनकर इलाज करबाक चाही। आर्थिक, सामाजिक आ मनोवैज्ञानिक दृष्टिकोणसँ बेमारसभके स्थिति समैझ इलाज कएलासँ सेवा आओर प्रभावकारी हएत।”
डा. पौडेल कहलैन “आइ अस्पतालद्वारा विभिन्न कार्यक्रम आयोजित क विश्व क्यान्सर दिवस मनाएल जा रहल छै। भोर वाकाथनक बाद, दुपहर क्यान्सर विजेता, बेमार आ हुनकर परिवारसभ सङे अन्तरक्रिया आ क्यान्सर विरुद्ध विभिन्न सचेतनामूलक कार्यक्रम आयोजन कएल जाएत।
